که درلودی دلبرانو څه انصاف

که درلودی دلبرانو څه انصاف

نشته ما غوندې په مینه کې څوک صاف

کا شانه غوندې مې زړه شګاف شګاف شه

ځای یې نه مومم د زلفو په شګاف

هسې بد ایسي خوبان په رقیبانو

لکه واخلي سګ بازي په لاس اشراف

هسې زېب کا ښکلی مخ په خال و خط کې

لکه واغوندې مکې ته تور غلاف

ښه نغمه زما په زړه کا هسې چارې

لکه کا يې په پخه ژۍ د نداف

زه او صبر سره لېرې یو ناصحه

په دروغ را باندې نه شي دغه لاف

چې و نورو ته باخښه بوس و کنار شي

خدای به ما ته تش کاته کاندي معاف

خدای دې ما وعده خلاف نه کا په عشق کې

که خوبان شو دروغجن وعده خلاف

د حمید له فکره مه پوښته عام خلق

د زربفتو قدر څه زده بوریا باف

د حمید د مینې کوټ به کره ووځي

که پرې ځير شي قدردان دانا صراف